پشکداریا زانکۆیا زاخۆ د ئاهەنگا دەرچوون و ڕێزلێنانا قوتابیێن پەنابەر یێن بەرنامێ (DAFI) دا
ب مەرەما پشتەڤانیکرن و هاندانا قوتابیێن پەنابەر، هاریکارێ سەرۆکێ زانکۆیێ بۆ کاروبارێن قوتابیان (پ.هـ.د. رمضان جعفر مصطفی)، ب یاوەرییا هژمارەک ژ قوتابیێن پەنابەر یێن زانکۆیا زاخۆ، پشکداری د ئاهەنگا دەرچوون و ڕێزلێنانێ یا بەرنامێ زەمالێن خواندنێ یێ ئەلبێرت ئاینشتاین یێ ئەلمانی (DAFI) بۆ سالا ٢٠٢٦ێ دا کر.
ئەڤ ئاهەنگە ل ڕێکەفتی (٢٣ ئیلوولا ٢٠٢٦) ل هۆتێل دیدەمان ب هەڤکاریا (دەزگەهێ سورووح بۆ پێشڤەبرنا بەردەوام) هاتبوو ڕێکخستن. مەرەم ژ ڤێ ئاهەنگێ پیرۆزکرنا دەستکەفتێن وان قوتابیێن پەنابەر بوو یێن کو ب سەرکەفتیانە و ب ئەنجامێن باش خواندنا خۆ یا بلند ل زانکۆیێن عێراقێ ب دوماهیک ئیناین.
د ڕێورەسمان دا، رێز ل پشتەڤانیا مەزن یا زانکۆیێن عێراقێ ب گشتی و زانکۆیا زاخۆ ب تایبەتی، و هەروەسا وەزارەتا خواندنا بلند و ڤەکۆلینێن زانستی هاتە گرتن، کو ڕۆلەکێ بەرچاڤ هەبوویە د پێشڤەبرنا دەستگەهشتنا ڤەکری یا خواندنا بلند بۆ پەنابەران. هەروەسا گەنگەشە ل سەر ڕێکێن بهێزکرنا هەڤکاریان، پێشڤەبرنا شیانان، و دابینکرنا دەرفەتێن کارکرنێ بۆ پەنابەران و جڤاکێ مێهڤاندار هاتە کرن.
هەژی گۆتنێ یە، ژ دەمێ ڕنگەهاندنا بەرنامێ (DAFI) ل عێراقێ ل سالا ٢٠١٦ێ، تا نوکە ٤٨٨ کچ و کورێن گەنج یێن پەنابەر شیانە ب ڕێکا ڤێ پشتەڤانیێ بگەهنە خواندنا بلند و پشکداریەکا کارتێکەر د جڤاکێن خۆ دا بکەن.